Bütün məqalələr
—

Almaniya tələbə vizası: TLScontact və addım-addım proses

Almaniyada təhsil milli viza (D-Visum) tələb edir. Azərbaycanda müraciətlər TLScontact mərkəzi vasitəsilə qəbul olunur. Sənədlərdən randevuya qədər tam bələdçi.

—
— —
—
📄

Almaniya tələbə vizası: TLScontact və addım-addım proses

Almaniyada təhsil milli viza (D-Visum) tələb edir. Azərbaycanda müraciətlər TLScontact mərkəzi vasitəsilə qəbul olunur. Sənədlərdən randevuya qədər tam bələdçi.

Almaniyada təhsil almaq istəyən hər bir tələbə milli viza (D-Visum) əldə etməlidir. Bu viza ölkədə 90 gündən artıq qalmaq üçün nəzərdə tutulmuşdur. Azərbaycanda Almaniya üçün viza müraciətləri TLScontact mərkəzi vasitəsilə qəbul edilir.

Bir baxışda: Almaniya tələbə vizası Viza tipi: milli (D) viza. Viza rüsumu: €75 (18 yaşdan kiçik müraciətçilər üçün €37,50 təşkil edir). Baxılma müddəti: orta hesabla 25 gündür, ancaq proses 3 aya qədər uzana bilər. Müraciət yeri: TLScontact mərkəzi, Bakı.

Almaniya tələbə vizası nədir?

Almaniyada təhsil müddəti 90 gündən uzun olduğu üçün adi Şengen vizası kifayət etmir. Bunun üçün sizə milli viza (D-Visum) lazımdır. Həmin vizanı üç məqsədlə əldə edə bilərsiniz: birbaşa təhsil (artıq qəbul almısınızsa), təhsilə hazırlıq (universitet qəbulu gözləyirsinizsə və ya Studienkolleg hazırlığı keçirsinizsə) və təhsil məqsədli dil kursu üçün.

Müraciəti kim qəbul edir? — TLScontact

Bakıda Almaniya üçün rəsmi viza mərkəzi olan TLScontact fəaliyyət göstərir. Sənədlərin qəbulu və biometrik məlumatların toplanması məhz burada həyata keçirilir. Vizanın təsdiq edilməsinə isə Almaniya Səfirliyi və ya Konsulluğu qərar verir.

  • Ünvan: Demirchi Tower, 3-cü mərtəbə, Xocalı pr. 37, Bakı.
  • Məlumat xətti: +994 12 310 34 24 (Bazar ertəsi–Cümə, 09:00–17:00).
  • Şəxsən iştirak — milli viza müraciətində nümayəndənin iştirakı yolverilməzdir, mərkəzə mütləq özünüz yaxınlaşmalısınız.
  • Əlavə xidmətlər — pasportun kuryer vasitəsilə ünvanınıza çatdırılması və sənədlərin andlı tərcüməsi bura daxildir.

Lazımi sənədlər

Sənədlərin tam və düzgün hazırlanması viza prosesinin ən əhəmiyyətli hissəsidir. Müraciət zamanı adətən aşağıdakı sənədlər tələb olunur:

  • Pasport — etibarlı olmalı, içində ən azı 2 boş səhifə qalmalıdır. Məlumat səhifəsinin və möhür-viza olan bütün səhifələrin surətini də təqdim edirsiniz.
  • Universitet qəbulu — Zulassung və ya şərti qəbul məktubu tələb olunur.
  • Maliyyə sübutu — Sperrkonto (€11.904) və ya təqaüd sənədi.
  • Tibbi sığorta — ən azı €30.000 təminatlı, bütün Şengen ölkələrində etibarlı və ilk 90 günü əhatə edən səyahət sığortası (Incoming sığorta). Universitetdə qeydiyyatdan sonra TK və ya AOK kimi dövlət sığortasına keçə bilərsiniz.
  • Biometrik şəkillər — 2 ədəd, 3,5 x 4,5 sm ölçüdə, son 6 ay ərzində çəkilmiş biometrik foto.
  • Dil sertifikatı — təhsil alacağınız proqramın dilinə uyğun sertifikat (alman və ya ingilis dili).
  • Diplom və qiymət cədvəli — rəsmi tərcümə və təsdiq olunmuş sənədlər.
  • Motivasiya məktubu və CV — akademik məqsədlərinizi ifadə edən məktub və tərcümeyi-hal.
  • 18 yaşdan kiçik müraciətçilər üçün — doğum haqqında şəhadətnamənin surəti almancaya notarial təsdiqli tərcümə ilə, üstəlik valideynlərin (qəyyumların) Almaniyada qalmağa razılığını təsdiqləyən notarial bəyannamə.
Sənəd təsdiqində yenilik (2026) 16 mart 2026-dan Azərbaycanla Almaniya arasında Haaqa Apostili qüvvədədir. Yəni diplom və digər rəsmi sənədlər üçün artıq Almaniya səfirliyinin konsul təsdiqi (leqallaşdırma) lazım deyil, Bakıda ASAN xidmət (№5 və №7) tərəfindən verilən apostil kifayətdir. Bu, prosesi xeyli sadələşdirir. Apostil və tərcümə addımlarını ayrıca bələdçidə izah etmişik.

Addım-addım proses

  • Universitetdən qəbul alın — bu, viza müraciəti üçün ilk və əsas şərtdir.
  • Sperrkonto açın — tələb olunan €11.904 məbləğini bloklanmış hesaba köçürməlisiniz.
  • Konsulluq Portalında müraciət edin — Almaniyanın rəsmi portalında ərizəni dolduraraq bütün sənədləri sistemə yükləyirsiniz.
  • TLScontact mərkəzindən randevu götürün — sənədləriniz portalda yoxlanıldıqdan sonra görüş vaxtı təyin edirsiniz.
  • Mərkəzə şəxsən yaxınlaşın — sənədlərinizi təqdim edir və biometrik məlumatlarınızı verirsiniz.
  • Qərarı gözləyin — pasportunuzu şəxsən və ya kuryer vasitəsilə təhvil alırsınız.

Maliyyə sübutu — Sperrkonto

Viza müraciəti zamanı Almaniyada yaşayış xərclərinizi qarşılaya biləcəyinizi sübut etməlisiniz. Bunun ən geniş yayılmış üsulu Sperrkonto, yəni Almaniyada açılan bloklanmış bank hesabıdır. Tələb olunan illik məbləğ təxminən €11.904, aylıq limit isə €992 təşkil edir (bu rəqəmlər hər il yenilənir). Alternativ maliyyə sübutu kimi Almaniya dövlət qurumundan ayda ən azı €992 məbləğində təqaüd sənədi və ya Verpflichtungserklärung (Aufenthaltsgesetz §§ 66-68 üzrə rəsmi öhdəlik bəyannaməsi) qəbul olunur. Bu bəyannaməni adətən Almaniyada yaşayan zamin şəxs yerli miqrasiya idarəsində (Ausländerbehörde) verir: sənəd 6 aydan köhnə olmamalı, məqsəd hissəsində təhsil göstərilməli və zaminin ödəmə qabiliyyəti təsdiqlənməlidir. Ətraflı məlumatı Sperrkonto bələdçimizdən və Almaniyada təhsil məqaləmizdən əldə edə bilərsiniz.

Viza rüsumu və müddət

  • Viza rüsumu: €75 (18 yaşdan kiçik müraciətçilər üçün €37,50 təşkil edir).
  • Orta baxılma müddəti: Təxminən 25 gündür.
  • Maksimum müddət: Proses 3 aya qədər uzana bilər.
  • Tövsiyə: Təhsilinizin başlamasına ən azı 3 ay qalmış müraciət etməyiniz məsləhətdir.

Viza alındıqdan sonra

Verilən D vizası ilkin olaraq 3 aylıq olur. Almaniyaya çatdıqdan sonra yaşadığınız şəhərdə rəsmi qeydiyyatdan (Anmeldung) keçməli və yaşayış icazəsi (Aufenthaltstitel) üçün xarici işlər idarəsinə (Ausländerbehörde) müraciət etməlisiniz. Bu icazə adətən sizin bütün təhsil müddətinizi əhatə edir.

Tez-tez verilən suallar

Şengen vizası ilə təhsil almaq olarmı?

Xeyr. Şengen vizası yalnız 90 günlük qısamüddətli səfərlər üçün nəzərdə tutulmuşdur, Almaniyada təhsil almaq üçün isə mütləq milli (D) viza əldə etməlisiniz.

Randevuya başqası mənim əvəzimə gedə bilərmi?

Xeyr. Milli viza müraciəti zamanı mərkəzdə şəxsən iştirak etməyiniz məcburidir.

Sperrkonto olmadan viza alınar?

Maliyyə təminatını təqaüd proqramları və ya rəsmi zəmanət bəyannaməsi (Verpflichtungserklärung) vasitəsilə də sübut edə bilərsiniz, ancaq Sperrkonto bu sahədə ən çox qəbul edilən və etibarlı sayılan üsuldur.

Viza prosesini birgə aparaq Passport Academy 2016-cı ildən bəri tələbələrə sənədlərin hazırlanmasında, Sperrkonto açılmasında və TLScontact randevusunun alınmasında — bütün viza prosesində yaxından dəstək olur. Gəlin səhvsiz və vaxtında müraciət etmək üçün birlikdə addımlayaq. Ödənişsiz konsultasiya al